O número de casos activos de coronavirus na provincia de Lugo experimentou un descenso significativo, segundo os datos ofrecidos ao mediodía desde martes polo Servizo Galego de Saúde (Sergas). O reconto oficial contabiliza 179 positivos, 44 menos dos rexistrados o pasado luns.
No Hospital Público da Mariña permanecen tres ingresados a causa do virus, un deles en planta e dous na Unidade de Coidados Intensivos (Uci) do centro hospitalario de Burela.
Outros tres pacientes fican na unidade de críticos do Hospital Universitario Lucus Augusti (HULA). No tocante á hospitalización, hai un caso menos, con tres doentes no Virxe dos Ollos Grandes e un no HULA e na Mariña, para un total de cinco.
En domicilio documéntanse 43 casos menos, para un total de 169.
Cabe salientar que o Sergas modificou case dous meses despois os criterios de comunicación dos datos oficiais sobre a pandemia, incorporando o mesmo día e sen orde cronolóxica todas as altas epidemiolóxicas, aquelas que se produciron en domicilio ao contar con PCR negativa ou co tempo suficiente de illamento para considerar «clinicamente» superada a doenza. De aí a caída dos casos documentados, de 675 o pasado martes, a 179, no prazo dunha semana.
