O número de casos activos de coronavirus na provincia de Lugo segue a minguar, segundo o reconto oficial ofrecido este sábado polo Sergas. Son 44 os infectados pola doenza, sete menos ca onte, e o Hospital Público da Mariña segue sen ingresados con positivo; tampouco se documentan persoas enfermas do virus nas residencias da bisbarra.
No tocante á hospitalización, os únicos tres ingresados a causa da pandemia permanecen no HULA, un na Uci e dous en hospitalización. Hai 41 pacientes illados en domicilio.
No histórico da provincia, o Sergas documenta 27 falecementos por mor da pandemia, cinco deles na Mariña; unha sexta persoa morreu na Uci de Burela tras ingresar polo virus e superar a enfermidade no seu período na unidade de críticos. Déronse 877 altas.
A nivel galego, a Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 749, deles 170 son da área da Coruña, 44 da de Lugo, 82 da de Ourense, 29 da de Pontevedra, 269 da área de Vigo, 136 da de Santiago, e 19 da de Ferrol.
Do total de pacientes positivos, 3 permanecen en Uci, 36 están en unidades de hospitalización e 710 no domicilio. Polo de agora, en Galicia hai un total de 9.936 persoas curadas, rexistrándose 615 falecementos. O número de PCR realizadas é de 141.331.