O número de casos activos de coronavirus na provincia mantense en 30, segundo o reconto oficial ofrecido este luns -xornada na que comeza a fase 3 da desescalada– polo Sergas. No Hospital Público da Mariña non hai ingresados por Covid-19 e tampouco se documentan positivos nas residencias da bisbarra, acorde coa mesma estatística.
O único hospitalizado a causa da pandemia na área lucense permanece nunha planta do HULA. En domicilio documéntanse 29 casos, os mesmos ca onte.
No histórico da provincia, o Sergas contabiliza un total de 28 falecementos, cinco deles na Mariña Lucense, ademais dunha sexta persoa que faleceu na Uci de Burela tras superar a doenza durante o seu período na unidade de críticos. Déronse 899 altas.
No tocante a Galicia, a Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 515; deles 113 son da área da Coruña, 30 da de Lugo, 43 da de Ourense, 16 da de Pontevedra, 193 da área de Vigo, 107 da de Santiago, e 13 da de Ferrol.
Do total de pacientes positivos, 1 permanece en Uci, 19 están en unidades de hospitalización e 495 no domicilio. Polo de agora, en Galicia déronse 10.252 altas, rexistrándose 618 falecementos. O número de PCR realizadas é de 151.390.
