O número de casos activos de coronavirus na provincia de Lugo segue a baixar. Segundo o reconto oficial ofrecido polo Sergas este domingo, na área lucense documéntanse un total de 21 positivos, un menos ca no cómputo de onte.
Non hai ingresados por Covid-19 no Hospital Público da Mariña, nin tampouco se detectan infectados polo virus nas residencias da bisbarra. Os únicos dous hospitalizados na área lucense -un máis có pasado sábado- permanecen en plantas do HULA. Dezanove pacientes son atendidos en domicilio, dous menos ca onte.
No histórico da provincia contabilizáronse un total de 28 falecementos, cinco deles na Mariña, ademais dunha sexta vítima mortal que morreu na Uci de Burela tras ingresar por Covid-19 e superar o virus no seu período na unidade de críticos. Déronse 915 altas.
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 351, deles 109 son da área da Coruña, 21 da de Lugo, 27 da de Ourense, 8 da de Pontevedra, 140 da área de Vigo, 34 da de Santiago, e 12 da de Ferrol.
Do total de pacientes positivos, 8 están en unidades de hospitalización e 343 no domicilio. Non hai pacientes positivos en Uci. Polo de agora, en Galicia hai un total de 10.486 persoas curadas, rexistrándose 619 falecementos. O número de PCR realizadas é de 158.324.
