O número de casos activos de coronavirus na provincia de Lugo mantense estable por quinto día consecutivo, cun total de 17 positivos, segundo o reconto oficial ofrecido este mércores polo Servizo Galego de Saúde (Sergas).
Non hai ingresados por Covid-19 no Hospital Público da Mariña. O único paciente hospitalizado a causa da pandemia na área lucense permanece nunha planta do Hospital Universitario Lucus Augusti (HULA). Dezaseis doentes son atendidos en domicilio.
Tampouco se detectan persoas infectadas nas residencias da bisbarra.
No histórico da provincia documéntanse 28 falecementos, cinco deles na Mariña, ademais dunha sexta vítima mortal que ingresou por Covid-19 e faleceu na Uci de Burela malia superar a doenza durante o seu período na unidade de críticos. Déronse 921 altas.
No tocante a Galicia, houbo un novo descenso dos casos, de 335 a 331.
