A Consellería de Sanidade informa que, nestes momentos, segundo as probas realizadas ata esta mañá, confírmanse outros 26 casos positivos de persoas afectadas por coronavirus no brote da Mariña Lucense, o que eleva a 85 o número total de casos detectados.

O crecemento do número de infectados foi expoñencial nos últimos tres días, segundo os datos oficiais ofrecidos polo Servizo Galego de Saúde (Sergas). O pasado día 2 documentáronse doce positivos máis, outros doce o día 3 e finalmente 26 este sábado. Deste xeito, os casos activos reportados aumentaron un 59% nas últimas tres xornadas.

Dos 85 casos positivos “a maioría son asintomáticos ou presentan síntomas de carácter leve”, e teñen a obriga de gardar corentena durante 14 días.

Aumenta a presión hospitalaria no Hospital Público da Mariña; ás dúas persoas ingresadas, un home residente en Burela de 71 anos e unha muller que foi hospitalizada en atención a outra patoloxía e deu positivo na proba PCR, súmanse outros dous pacientes. Todos os doentes con Covid-19 que permanecen no centro hospitalario de Burela están en planta.

As persoas cuxas probas deron resultado negativo, indica o Sergas permanecen en seguimento no seu domicilio. Hai, segundo a Consellería de Sanidade, “máis de 700 persoas” confinadas, e realizáronse “máis de 1.000 probas PCR“.

O primeiro caso de infección por Covid-19 detectouse, expón o Sergas, na tarde do martes 23 de xuño. A partir desta confirmación inicial, fíxose un rastrexo e analizáronse todos os contactos das persoas que se foron vendo afectadas.