A Consellería de Sanidade aclarou aos concellos da comarca da Mariña que o control das persoas illadas ou en corentena levarao a cabo os servizos asistenciais da xefatura territorial do Sergas en colaboración coa Policía Autonómica. Segundo fontes do departamento que dirixe o conselleiro Jesús Vázquez Almuiña, esta foi unha das cuestións trasladas aos gobernos locais na reunión celebrada na mañá deste luns para abordar a situación aberta na comarca, pechada ata o venres para controlar o brote de Covid-19 no norte da provincia luguesa.

Sanidade insistiu aos Concellos que “son competentes para velar polo cumprimento do uso de máscara, o control de aforo e os horarios de peche dos locais, así como controlar os espazos e instalacións de titularidade municipal”. Así mesmo, solicitan a súa colaboración para que “dentro das súas posibilidades” os corpos das Policías Locais e Protección Civil poidan exercer “tarefas de información” das “obrigas” establecidas na comarca mariñá. A Mancomunidade de Municipios da Mariña, así como os gobernos locais de Burela -onde se focalizan a maior parte dos positivos-, Barreiros ou Ribadeo aseguraron que a Xunta de Galicia elude responsabilidades a nivel de vixilancia para que as asuman os executivos municipais.

Este luns, a Federación Galega de Municipios e Provincias (Fegamp) censurou que a Administración autonómica traslade aos alcaldes a responsabilidade de exercer como “autoridade sanitaria” en episodios de peches de áreas por brotes de Covid-19, como o que foi decretado para a comarca da Mariña, onde se documentan actualmente 119 casos activos, con arredor de 1.100 persoas confinadas.

A Fegamp critica que a Consellería de Sanidade impoña aos gobernos locais a consideración de “autoridade sanitaria” segundo a cal deberán “garantir a vixilancia, inspección e control do cumprimento” das medidas decretadas nos seus municipios.

A federación lembra que a Lei reguladora de Bases de Réxime Local establece que a xestión de crises sanitarias recae na Dirección Xeral de Saúde, é dicir, na Xunta e que, por tanto, corresponde á Administración autonómica coordinar, achegar medios e elaborar plans de actuación para facer fronte a situacións como a aberta na Mariña.

Neste sentido, os concellos advirten das súas “limitacións” en canto a recursos humanos e materiais para facer fronte ás funcións que lle adxudica a Xunta. Como exemplo diso, sinalan que “o 60%” dos concellos galegos carecen de Policía Local e que un “número significativo” de municipos con este corpo contan con persoais mermados pola taxa de reposición.

Así as cousas, as entidades locais reivindican o traballo realizado ao longo desta crise sanitaria “asumindo funcións engadidas e mesmo impropias sen dispoñer de medios extraordinarios para o seu desenvolvemento”, polo que demadan á Xunta que asuma as súas responsabilidades para que “a protección da saúde sexa igual para todos os galegos independentemente da facenda local de cada concello”.