EFE. O alcalde de Burela, Alfredo Llano, confirmou que os casos activos de coronavirus continúan baixando no municipio, que permanece pechado a entradas e saídas por orde da Consellería de Sanidade, de modo que a día de hoxe son 103, trece menos dos que había na xornada anterior.
En declaracións aos medios de comunicación, Llano volveu enxalzar o comportamento dos veciños do municipio, que se mantén pechado polo brote de Covid-19 localizado, e recordou que o “obxectivo é ter cero positivos” no menor tempo posible.
De momento, precisou, “todo avanza segundo o previsto, imos ver si conseguimos que se manteñan esa tendencia”.
Por outra banda, confirmou que mañá comezará o cribado con probas diagnósticas do propio persoal municipal, con especial atención a aqueles colectivos que están máis expostos ao contaxio polo seu contacto permanente coa xente, como é o caso da Policía Local ou o persoal do servizo de axuda no fogar.
COMERCIO E CONCELLO SOLICITARÁN AXUDA ÁS ADMINISTRACIÓNS
Ademais, confirmou que mañá -día 17 de xullo- tamén iniciará os contactos cos hostaleiros e comerciantes locais, xunto con persoal técnico do Concello, para presentar unha “solicitude formal” de axudas especiais a este municipio, o máis afectado da comarca polo brote e polas medidas sanitarias para tratar de frealo.