EFE. Os densos bancos de néboa que dificultan a visibilidade e condicionan a seguridade dos usuarios obrigaron por segundo día consecutivo á Dirección Xeral de Tráfico a cortar a circulación en ambos sentidos na Autovía do Cantábrico A-8 ao seu paso polos municipios lucenses de Mondoñedo e Abadín.
A autovía permanece cortada desde onte, luns, ás 17.06 horas, como consecuencia da néboa no Alto do Fiouco, concretamente no tramo comprendido entre os quilómetros 536 e 552.
Como vén sendo habitual nestes casos, habilitáronse os correspondentes desvíos alternativos pola estrada Nacional 634 ao seu paso polo municipio de Mondoñedo.
Precisamente, a finais de xaneiro, o Ministerio de Transportes, Mobilidade e Axenda Urbana formalizou sete contratos de investigación e desenvolvemento, mediante o sistema de Compra Pública Precomercial, para o “deseño, implementación e experimentación con prototipos de tecnoloxía innovadora” cos que buscar unha solución aos problemas que provoca a néboa nese tramo.
Segundo informou o propio Ministerio, eses contratos comprenden a “demostración da viabilidade das solucións propostas”, dentro da primeira fase do proceso de Compra Pública Innovadora.
A través dese sistema, as empresas que participan neste proceso instalarán os prototipos nun “tramo de proba anexo ao tramo da autovía A-8 entre Mondoñedo e A Xesta“, co obxectivo de “validar” o sistema proposto “de cara á súa futura implantación sobre a estrada para minimizar os efectos adversos producidos no tráfico pola néboa densa”, informou o Ministerio.
