O Servizo Galego de Saúde (Sergas) contabiliza 79 casos activos no brote de coronavirus da Mariña, sete menos ca onte, segundo o reconto comunicado este martes. A Consellería de Sanidade expón que nas últimas horas detectáronse un total de tres positivos novos, mentres que dez pacientes con Covid-19 recibiron a alta.
O Sergas concretou que das 44 PCR realizadas nesta última xornada “a persoas relacionadas con este brote”, tres resultaron positivas e as restantes, 41, negativas.
Dos 79 casos activos, “a maioría son asintomáticos ou presentan síntomas de carácter leve”, concreta o Sergas, e teñen a obriga de gardar corentena durante 14 días. Tres pacientes con covid-19 atópanse ingresados no Hospital Público da Mariña e a súa evolución é “favorable”.
385 CONFINADOS
Do mesmo xeito, as persoas cuxas probas deron resultado negativo permanecen en seguimento no seu domicilio. Nestes momentos hai 385 persoas en seguimento domiciliario, 22 menos ca onte.
