O número de casos activos relacionados co brote de coronavirus que afecta á Mariña lucense sitúase en 36, tres menos ca onte, logo de darse 3 novas altas epidemiolóxicas e non rexistrarse ningún caso novo. Así o anunciou o Servizo Galego de Saúde (Sergas) este luns a través dun comunicado de prensa.

De acordo coa mesma fonte, o número de PCR realizadas nesta última xornada foi de 35, das que todas resultaron negativas.

Dos 36 casos activos, “a maioría son asintomáticos ou presentan síntomas de carácter leve, e teñen a obriga de gardar corentena durante 14 días”.

Dúas persoas con Covid-19 atópanse ingresadas no Hospital Público da Mariña e a súa evolución “é favorable”, resalta o Sergas.

Do mesmo xeito, as persoas cuxas probas deron resultado negativo permanecen en seguimento no seu domicilio. Nestes momentos hai 321 persoas confinadas, a mesma cantidade que na última actualización.

Por outra banda, tampouco se detectaron casos nas residencias. No xeriátrico de Xove hai unha traballadora afectada, pero non houbo máis positivos nin entre o persoal nin entre os usuarios.

O brote da Mariña deixou este luns de ser o principal foco de coronavirus de Galicia, despois de que no abrocho de Arteixo se localizaran 47 positivos. Le a información completa no Galicia Confidencial.