O número de casos activos de coronavirus na provincia de Lugo ascende a 321, 16 máis ca onte, segundo o reconto ofrecido este luns polo Sergas.
Dos 321 pacientes, seis están ingresados, todos no HULA, dous deles na Uci. 315 son atendidos en domicilio.
No histórico da provincia producíronse 32 falecementos, seis deles na Mariña, ademais da morte dun varón que faleceu na Uci do Hospital da Costa tras ingresar por coronavirus e superar a doenza no seu período na unidade de críticos. Déronse 1.299 altas e o número de casos acumulados ascenden a 1.652.
Nas residencias da comarca, documéntase un único positivo, o dunha traballadora do xeriátrico San Bartolomeu de Xove. Esta obreira non recibiu a alta polo momento, non como por erro publicou o pasado domingo o Xornal da Mariña. Non houbo máis infectados nin entre os residentes nin entre os usuarios do centro de maiores xovense.
