A empresa Greenalia, con sede na Coruña, anunciou este luns que emprenderá unha nova iniciativa, dirixida nesta ocasión aos escolares do concello lucense de Ourol, onde xa se ultima a posta en marcha dun parque eólico, e con cuxo alcalde, José Luis Pajón, asinou un acordo de colaboración.

O convenio rubricado este lns entre o rexedor e a directora de Desenvolvemento Corporativo e Sustentabilidade de Greenalia, a ex conselleira de Traballo e Benestar e Medio Ambiente Beatriz Mato, recolle unha achega de ata 60 euros de axuda á escolarización para os menores de 16 anos matriculados no curso escolar 20-21 nesta localidade, aos que se fará tamén entrega dunha mochila escolar para portátil.

Esta iniciativa enmárcase na política de responsabilidade social corporativa da compañía e con ela póñense as bases do que serán programas de acción social da Fundación Greenalia, a través da que Greenalia quere reinvestir naquelas contornas onde opera. Con esta medida, a empresa coruñesa quere axudar “nunha volta ao cole excepcional” e complexa para as familias, tras a crise do COVID-19. É a quinta acción destas características que pon en marcha a empresa este ano, pois o pasado mes de xullo asinou tamén acordos similares con catro concellos da zona de Costa da Morte, onde conta con proxectos en funcionamento ou en tramitación.

As instalacións de Ourol, cunha potencia instalada de 22,5 MW, poderán comezar a verter os seus primeiros MWh no último trimestre deste ano. O parque empresarial estará formado por un total de cinco máquinas, de 4,5 MW cada unha, cun rotor de 136 metros. Unha vez estea a pleno rendemento, producirá 65.300 MWh/ano, cunha repercusión positiva no medio ambiente, pois grazas a esta xeración de enerxía renovable evitaranse 24.150 tCO2 /ano, o que equivale a 16.300 coches circulando durante un ano.