O BNG de Viveiro levará a pleno unha moción para a creación dun “proxecto de recuperación” para o parque Pernas Peón.
O grupo nacionalista viveirense asegura que o espazo “foi durante décadas un espazo de descanso e ocio para varias xeracións de Viveiro, mais por desgraza deixou de selo pola inexistencia de políticas municipais medioambientais así como de plans de mantemendo e conservación do mesmo”. Unha situación, argumenta, que se “agravou” pola tala realizada en primavera do 2018, unha actuación “sen ningún tipo de estudo nin planificación”, critica a formación frontista.
O BNG viveirense alerta da “desaparición total da vexetación media-baixa tipo arbustos, plantas e flores, como tamén a caída constante de árbores e ramas co máis mínimo vendaval, obrigando a estar balizándoo cada pouco para evitar desgrazas”. A formación frontista tamén censura a “falta de mantemento” nas zonas de paso, de lecer e de ocio. Tamén se perderon “monumentos“, alega o Bloque viveirense, ao reubicarse “na Praza de Lugo o monumento a Díaz Freijo ou os canóns da fragata Magdalena situados agora nos Xardíns Noriega Varela“.
Por todo isto, os nacionalistas viveirenses propoñen unha moción que consta de tres puntos.
Primeiro, “a elaboración dun proxecto de recuperación ambiental e paisaxística para o emblemático parque municipal Pernas Peón, que contemple a eliminación das árbores en mal estado, reflexe o deseño e ordenación deste espazo así como a tipoloxía de plantas, árbores e elementos vexetais que se van a plantar no mesmo, os equipamentos e servizos que vai ter, incluíndo un plan de conservación e mantemento para evitar o seu abandono e desertización nun futuro”, expón a concelleira nacionalista, Míriam Bermúdez.
CIRCUÍTO DEPORTIVO
Tamén, a “creación dun circuito perimetral en terra batida que permita a práctica deportiva, ben sexa andar, correr ou bicicleta, así como para o uso e desfrute de adolescentes e crianzas. Tal e como teñen outras zonas verdes do Concello como é o espazo de en fronte á Piscina Municipal, constatando que non impide para nada outras actividades senón que abre todo un abanico de posibilidades para a veciñanza”, indica o BNG viveirense.
SKATE PARK
Finalmente, “estudar a posibilidade da creación dun Skate Park, dado que na actualidade non hai sitio para a práctica deste deporte no concello, podéndose aproveitar a parte que está máis perto da residencia DomusVi. Un lugar que leva décadas sen poderen utilizarse ao contar cunha caseta abandonada e un burato que podia aproveitarse como parte destas instalacións. A falta de lugares para a práctica deste deporte está a provocar o deterioro doutros que non están destinados para este uso, creando tamén confrontacións entre viandantes e persoas sobre patíns”, conclúe a iniciativa.
