A Asociación de Nais e Pais (Anpa) A Faxarda do Ceip Gregorio Sanz de Ribadeo denunciou este venres que o ascensor do centro non se pode utilizar, o que prexudica a un pequeno que usa cadeira de rodas e que non puido empregalo neste inicio do curso. Non se trata dun problema de mantemento; a Xunta de Galicia construíu a instalación ao longo dos últimos meses e en principio está lista para estrear, pero o Goberno autonómico, segundo a versión do Concello, acometeu as obras “sen solicitar licenza de obra nin presentar proxecto nin documentación” ata hai uns días, do que deriva que careza de permiso.
UN “DISGUSTO TREMENDO”
Ao longo da súa vida, Darius Gabriel Dumitrescu, o neno que precisa do ascensor, foi superando as dificultades que lle provoca a súa atrofia espiñal muscular, unha das denominadas enfermidades raras, que afectan a moi pouca poboación. A necesidade que provoca esta doenza dun tratamento intensivo de fisioterapia e fármacos fixo que a comunidade educativa e a sociedade ribadense se envocarsen con el e a súa familia. Pero este venres, no día do inicio do curso, este neno que cursa cuarto de Primaria tivo que afrontar outro problema; a imposibilidade de subir á segunda planta, onde por primeira vez -os escolares de menor idade teñen as súas aulas no primeiro andar- tiña que asistir a clase cos seus compañeiros.
“Foi un disgusto tremendo para el e para a súa familia”, expón Beatriz Irigoyen, que exerceu para este medio como voceira da Anpa. A dirección do centro non podía utilizar o ascensor ao ser “unha construción ilegal” e directiva e Anpa tiveron que buscar unha alternativa, atopar un espazo no primeiro andar e baixar a todos os estudantes do curso para que Darius poidese ser, malia as limitacións que sofre pola súa enfermidade, un alumno máis. Unha situación que se tornou máis complexa, indica a portavoz das familias, porque nun contexto de pandemia pola Covid-19 “houbo que facer cambios para cumprir co protocolo“.
NA APERTURA DAS CLASES, ANPA E DIRECCIÓN DEBERON HABILITAR UN ESPAZO NA PRIMEIRA PLANTA
“Esta cuestión vén de tempo”, concreta Irigoyen, que expón que no centro educativo ribadense había un montacargas a partir do que, a petición da comunidade educativa, se proxectou construír un ascensor. Segundo precisa, a obra foi aprobada a principios deste ano e licitada antes da pandemia, comezando as actuacións despois. “A nosa sopresa foi que unha vez os traballos están feitos non se pode usar; o Concello dinos que non hai constancia da obra, de xeito que agora hai que facer os pasos para poder legalizala”, remarca.
A Anpa asegura “descoñecer” de quen é “a culpa” desta situación, pero afirma que “pedirá responsabilidades ás Administracións correspondentes polo sucedido. E se non houbese un espazo axeitado na planta baixa para trasladar as clases?”, pregunta, para engadir que “non pedimos unha solución por se acaso, senón para unha necesidade que temos agora mesmo”. O problema evidencia unha vez máis a necesidade de adaptar na medida das posibilidades os centros educativos para favorecer a integración das persoas con mobilidade reducida.
O GOBERNO LOCAL ENTEROUSE DA OBRA “DE XEITO INFORMAL” A TRAVÉS DA DIRECTIVA DO CENTRO
Desde o Concello, o alcalde de Ribadeo, o nacionalista Fernando Suárez Barcia, expón que se enterou da realización da obra hai “pouco máis dunha semana” e de xeito “totalmente informal”, cando desde a dirección do centro “nos preguntaron quen ía acometer o mantemento do ascensor”.
O rexedor asegura que o goberno local non recibiu a documentación pertinente ata despois de finalizadas as actuacións. “Non estamos a falar duns traballos pequenos nunha casiña, senón duns importantes e nun centro educativo; hai que formular unha solicitude de licenza de obra, e para ela hai que presentar un proxecto correspondente que deben avaliar os técnicos”, indica Suárez Barcia. O alcalde ribadense afirma que “non poñemos ningunha traba” ao proxecto da Xunta, que de acordo coa súa versión presentou “un orzamento e unha instancia” a posteriori. O Xornal da Mariña consultou fontes da Administración autonómica, sen recibir polo momento resposta ao respecto.
