O Partido Popular (PP) de Barreiros emitiu este xoves un comunicado no que atribúe o aumento de poboación do municipio nos últimos meses, superando a barreira dos 3.000 habitantes por primeira vez desde o 2014, á política no tocante á política en materia de urbanismo do anterior goberno local, encabezado polo actual voceiro da formación conservadora, Alfonso Fuente Parga.
Barreiros ten na actualidade 3.023 residentes. No seu comunicado, Fuente Parga extráñase de que a actual alcaldesa, a nacionalista Ana Ermida, “non saiba por que medra a poboación no seu municipio. O incremento é o resultado de todo aquilo ao que se opuxo o BNG anos e anos, e que estaba claro que, antes ou despois, daría, entre outros, este froito”, argumenta.
Para Fuente Parga “é evidente que as actuais circunstancias estimulan o asentamento de novos veciños en Barreiros. Este feito dáse porque hai vivenda dispoñible, chámese segunda vivenda ou como se queira; pero haina. E como hai vivenda, Barreiros benefíciase dalgunhas dinámicas derivadas da crise sanitaria, unha delas, o teletraballo. Senón houbera vivenda dispoñible, pois seguramente non se podería aproveitar esta circunstancia”, remarca.
“Iso é o que non di a alcaldesa, porque non lle interesa, porque isto de hoxe é o resultado do traballo durante anos dos equipos do PP no Concello. Estes son os froitos cultivados polo traballo dos gobernos do Partido Popular en Barreiros”, finaliza Fuente Parga.
ABSOLTO DE PREVARICACIÓN URBANÍSTICA TRAS ASINAR LICENZA PARA 3.000 VIVENDAS ENTRE 2005 E 2006
O ex alcalde, cinco edís e a arquitecta municipal foron acusados de prevaricación urbanística polo Ministerio Fiscal e pola asociación ecoloxista Adega, ao “ver irregularidades” na concesión dunhas 40 licenzas para construír 3.000 vivendas entre 2005 e 2006. Todos serían absoltos deste delito por unha sentenza xudicial na que o propio maxistrado amosaba “dúbidas” de que o comportamento dos acusados fose “completamente legal”, aínda que non percibía unha actuación dolosa pola súa parte, alegando no auto que podía avaliarse a existencia dunha infracción administrativa, pero non penal.
Desas casas ás que o goberno local deu luz verde en pouco máis dun ano, só se acabaron 1.329, das que á altura de febreiro de 2019 só había habitadas 997.
Fuente Parga insistiu en atribuír esta situación e a “mala imaxe” de Barreiros, paradigma do bum urbanístico, non ao estoupido da burbulla inmobiliaria, poucos anos despois, senón á acción do Goberno bipartito da Xunta de Galicia -que no 2007 tentou restrinxir a construción suspendendo a normativa e aprobando unha Ordenación Urbanística Provisional, nunha medida tombada pola Xustiza a solicitude dos promotores, que non puideron executar obras para as que tiñan permiso municipal– .
