IniciosociedadeA Mariña reivindicará a súa gastronomía cunha guía dos 240 produtores locais...

A Mariña reivindicará a súa gastronomía cunha guía dos 240 produtores locais e vídeo-receitas

A Mancomunidade e a FCAM poñen en marcha unha campaña para respostar á crise económica provocada pola Covid-19 e posicionar a comarca como referente de turismo gastronómico

Publicada o

- Advertisement -

#CociñandoAMariñaLucense é a nova iniciativa que pon en marcha a Mancomunidade de Municipios da Mariña coa colaboración da Federación Comercio A Mariña (FCAM) e da Xunta de Galicia. Trátase dunha acción de resposta á actual crise sanitaria, cuxo obxectivo pasa por posicionar a comarca como referente do turismo gastronómico e por poñer en valor aos produtores, aos produtos e á gastronomía local.

PRESUMIR DE AGRICULTORES, GANDEIROS OU PESCADORES

#CociñandoAMariñaLucense inclúe unha guía na que se poderán atopar os datos dos 240 produtores locais que hai na Mariña, de sectores como a agricultura, a gandeiría, a horta, a pesca ou a avicultura. Ademais, porase en marcha un concurso de vídeo receitas, que se desenvolverá do 15 de outubro ao 15 de novembro. No acto de presentación da campaña, que tivo lugar no Cenima de Foz, interviñeron o presidente da Mancomunidade, Fran Cajoto, o coordinador e creador da iniciativa, Lucas Requejo, o presidente da FCAM, José Carlos Paleo, e o delegado territorial da Xunta en Lugo, Javier Arias.

A HOSTALERÍA E A VECIÑANZA AMOSARÁN PRATOS NAS REDES SOCIAIS

Cociñando A Mariña Lucense é unha iniciativa ecogastronómica novidosa coa que dar a coñecer os produtores e alimentos da comarca, onde a hostalería cociñará os produtos a través de vídeo receitas e onde se convidará a participar á cidadanía nun concurso de receitas de gastronomía local mariñá.

“TEMOS QUE RESALTAR DE ONDE VÉN O QUE COMEMOS”

Cajoto sinalou: “estamos ilusionados con este proxecto. Pouquiño a pouco imos poñendo pasos, xa se empezaron con outras iniciativas como a Ruta da Faba, que leva consolidada moito tempo. Non deixa de ser iso, poñer en valor produtores e produto local, tamén que perdamos o medo a indicar de onde ven o que comemos, se os pementos son de aquí, se o bonito é de Burela ou a pescada de Celeiro que se explique, porque é un valor engadido. Hai moitos produtos saborosos… e respectando aos asistentes onde mellor se come é na Mariña”, afirmou.

Cajoto agradeceu a colaboración da Federación de Comercio A Mariña e da Xunta de Galicia para levar adiante esta iniciativa. Tamén tivo palabras de agradecemento para Pilar García Porto, a responsable da Área de Turismo da Deputación de Lugo, que asistiu como convidada a este acto, xunto a representantes de Asociacións de Comerciantes e Hosteleiros, de produtores coma Boaga e Asoporcel, de técnicos, de concelleiros e de alcaldes da comarca.

A ECOGASTRONOMÍA COMO “PIAR DE DESENVOLVEMENTO”

O creador e coordinador da campaña, Requejo, dixo que “a aposta pola ecogastronomía como piar de desenvolvemento gastronómico, ten por obxectivo reactivar a produción agroalimentaria dende a perspectiva da biodiversidade local, promovendo accións que poñan en valor os nosos recursos gastronómicos para contribuír na consolidación dun turismo sostible”, indicou.

“con esta iniciativa queremos darlles visibilidade ao produtores agroalimentarios, a través da páxina web de amarinalucense.gal, onde se poderá poñerlles cara e descargar unha Guía de Produtores da Mariña Lucense. Tamén, dende finais de setembro a mediados de outubro de 2020 iremos dando a coñecer a todos eles nas redes sociais de A Mariña Lucense Turismo”.

Á PROCURA DA DESESTACIONALIZACIÓN DO TURISMO

Na súa intervención Requejo anunciou que “ademais, animaremos á hostalería local a que realicen as súas propias vídeo receitas cociñando os alimentos dos produtores de A Mariña Lucense. Poderanse ollar as súas elaboracións a partir do 15 de outubro nas nosas redes sociais e na lista de reprodución creada para esta fin da canle de Youtube da Mancomunidade: A Mariña Lucense Turismo. E por último, animaremos a participar nun concurso á cidadanía que poremos en marcha durante o mes de outubro e novembro, do 15 ao 15”, indicou.

Pola súa parte, Paleo subliñou que cantas máis iniciativas comarcais se organicen “mellor nos irá a todos” e contou que “a xente que ten segunda residencia na Mariña estase quedando aquí a teletraballar, algo que contribúe á desestacionalización da que tanto falamos. Temos que poñer en valor todo o que temos, iso axudaranos a todos a sobrevivir”, argumentou.

Paleo aludiu ao traballo que hai detrás deste proxecto: “este gran traballo que acabades de facer, que nos vai servir a moitos para comprar leitugas ou tomates en Mondoñedo, que non sabemos a quen comprarlle un tarro de mel se non está posto nun escaparate. Sobre todo á xente da hostalería que vai poder nutrirse de produtos de forma moito máis cómoda”. O presidente da Federación de Comercio A Mariña manifestou que “pola nosa parte nos poñemos a disposición de todo o mundo para seguir colaborando, porque este é un traballo de largo alcance, non hai metas, hai etapas, e esta é unha etapa real neste momento que vai servir para pasar o inverno dunha forma mellor”, rematou.

A XUNTA COMPROMETE “APOIO” PARA A MARIÑA

Arias, pola súa banda, salientou que “os tempos demandan un maior esforzo para remontar esta situación, e para iso este ano o Goberno galego incrementou nun 12%ata alcanzar os 92.000 euros– a achega ao convenio que subscribe coa Mancomunidade para a xestión do xeodestino. Igualmente no marco do convenio asinado cos touroperadores galegos, estase traballando na posta en marcha de novas experiencias turísticas na Mariña lucense. Así mesmo a Xunta pretende que a comarca se converta nun dos territorios galegos no que se poña en marcha un plan de sustentabilidade turística”, remarcou. Son as propostas do Executivo autonómico para unha hostalería e comercio mariñaos que sufriron o impacto do brote e do illamento da comarca en pleno mes de xullo.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...