O Concello de Ribadeo saca a licitación as obras de rehabilitación e reforma interior da praza de abastos, que suporán un investimento de preto de 60.000 euros, financiados con fondos propios e cunha achega xestionada ante o Agader. As empresas interesadas dispoñen de 20 días para presentar as súas ofertas.
Segundo expuxo o concelleiro de Desenvolvemento Local de Ribadeo, Pablo Vizoso, “as obras van resolver tanto as necesidades de funcionamento fundamentais para o desenvolvemento das actividades, como os aspectos máis formais para adaptarse á normativa e permitir unha maior comodidade tanto dos praceiros como da clientela”.
“Pretendemos modernizar a imaxe da planta baixa da praza, co obxectivo de consolidar este espazo como referente de venda de produtos frescos e de calidade e atraer máis clientes. Buscamos facelo máis luminoso; parte dos traballos están enfocados á mellora de eficiencia enerxética, e das condicións de accesibilidade”, expuxo o edil.
Así, Vizoso concretou que “se vai renovar o pavimento e os aseos, para axeitalos á normativa de accesibilidade; vanse colocar novas luminarias LED, mellorarase a rede de saneamento e a sinalización interior, para identificar os establecementos alí ubicados”, concluíu.
A obra realizarase integramente no 2021, comezando en xaneiro, para reducir os prexuízos económicos nos derradeiros meses deste ano, coa proximidade do Nadal.