O número de casos activos de coronavirus na provincia de Lugo é de 542, 24 máis ca onte, segundo o reconto ofrecido este xoves polo Sergas. Nas últimas 24 horas localizáronse 46 novos positivos, mentres que se deron 22 altas. Non houbo falecementos neste período.
Dos 542 contaxiados, 17 permanecen ingresados. O HULA atende 14 pacientes Covid-19, entre eles os tres da área lucense que requiren de coidados intensivos. O Hospital Público da Mariña coida dun doente infectado, mentres que o centro hospitalario de Monforte ten dous. No histórico da provincia documéntanse 92 falecementos, 3.087 altas e 3.721 casos acumulados.
RESIDENCIAS
No tocante ás residencias, só se localiza un caso na Mariña, o dunha traballadora do xeriátrico DomusVi Viveiro.
CENTROS EDUCATIVOS
Nos centros educativos da comarca non se detectaron positivos, segundo o reconto do Sergas.
CASE 850 FALECEMENTOS EN GALICIA, CON 5.675 POSITIVOS
A Dirección Xeral de Saúde Pública da Consellería de Sanidade informa que na última actualización, o número de casos activos de coronavirus en Galicia é de 5.675 (218 máis), deles 911 son da área da Coruña, 542 da de Lugo, 1.489 da de Ourense, 564 da de Pontevedra, 995 da área de Vigo, 891 da de Santiago e 283 da de Ferrol.
Do total de pacientes positivos, 47 están en Uci, 317 en unidades de hospitalización e 5.311 no domicilio. Polo de agora, en Galicia hai un total de 24.255 persoas curadas, rexistrándose 847 falecementos. O número de PCR realizadas é de 609.516.
