Unha muller de 91 anos e paciente de Covid-19, procedente da residencia de San Cibrao, faleceu este martes no Hospital Público da Mariña, segundo concretaron fontes do Servizo Galego de Saúde (Sergas).
Trátase da terceira vítima mortal que procede do xeriátrico de Cervo. Na residencia da Veiga, onde segundo o goberno municipal localizáronse máis de trinta contaxios entre usuarios e residentes, faleceron unha muller de 89 anos e un home de 81.
As mesmas fontes concretaron que outras seis persoas diagnosticadas por coronavirus faleceron en Galicia este martes. Entre elas, unha muller de 89 anos que permanecía ingresada no HULA, co que a provincia de Lugo rebasa os cen mortos -101- desde o inicio da pandemia.
Ademais, faleceron un home de 66 anos, no Chuac; un home de 58 anos, no Chuac, procedente da Residencia Ricardo Baró (Oleiros); dúas mulleres, de 95 e 93 anos, no Chuvi; e unha paciente de 83 anos, no Arquitecto Marcide. Todos eles tiñan patoloxías previas, segundo o Sergas.
