O comité de Alcoa San Cibrao amosou o seu apoio á folga que a hostalería da provincia de Lugo ten prevista para mañá, sábado 7 de novembro. Os sindicatos chaman ao persoal da fábrica a acudir ás concentracións que se celebrarán diante dos consistorios, como alternativa para aquelas persoas que non poidan desprazarse á capital provincial, onde a Asociación Provincial de Empresarios de Hostalería de Lugo (Apehl) convocou unha manifestación.
Segundo expuxo a través dun comunicado, o comité insta aos traballadores tanto do complexo industrial como das auxiliares a acudir con casco, chaleco de traballo ou algún símbolo que visibilice a loita que mantén o persoal contra o expediente de regulación de emprego (ERE) que Alcoa quere aplicar na planta de aluminio, ás protestas, que serán de 11.00 a 12.00 horas.
Os sindicatos insisten na “necesidade e obriga moral” de consumir no comercio e hostalería locais.
Segundo concreta a Apehl, están convocadas concentracións ante os 66 municipios da provincia, en protesta polo peche do sector nun total de 60 concellos -entre eles Viveiro, Burela, Lugo e Monforte-, incluído nas restricións que a Xunta de Galicia aplicará desde esta medianoite.
OS HOSTALEIROS DE RIBADEO DENUNCIAN QUE O SECTOR ESTÁ NUNHA SITUACIÓN “GRAVE”
Polo de agora, ao hostalería de Ribadeo anunciou a través dun comunicado de prensa que se concentrará ás 11.00 diante da Casa do Concello. O sector pretende “denunciar a grave situación pola que están a atravesar tras meses de confinamento, con restricións de aforamento desde o verán, con peches comarcais como o acontecido en xullo ou sufrindo o illamento da veciña Asturias ou de cidades como Lugo”.
Os hostaleiros indican que “a crise do noso sector arrastra ás empresas distribuidoras, á pesca, ás carnicerías, á agricultura, ás panaderías… a toda a cadea de provedores. Estamos convencidos de que todos xuntos podemos saír disto e por iso temos que loitar”, afirman os empresarios, que se concentrarán -coa debida distancia interpersoal e o uso das máscaras- co slogan ‘Salvemos a hostalería‘.
