Centos de persoas concentráronse ante os consistorios ao longo de toda a xeografía da Mariña Lucense na mañá deste sábado para denunciar a “grave situación” pola a que está a atravesar a hostalería desde o inicio da pandemia do coronavirus o pasado mes de marzo. Ribadeo, Foz, Burela ou Viveiro -estes dous últimos, entre os 60 municipios nos que os establecementos do sector hostaleiro ficarán pechados por un período revisable dun mes-, San Cibrao -que foi emprazamento alternativo á capital municipal de Cervo ao concentrar a maioría dos negocios- ou San Cosme de Barreiros foron algúns dos lugares que acolleron protestas, unha por cada un dos 66 termos municipais lucenses.

DE LOITO POR PREVISIBLES PECHES

Empresas distribuídoras cos seus vehículos, comerciantes, clientes, traballadores e empresarios hostaleiros secundaron as chamadas realizada pola Asociación Provincial de Empresarios de Hostalería de Lugo, cuxo acto principal reivindicativo foi celebrado na capital provincial, cunha manifestación que percorreu as rúas lucenses. Na Mariña, portando pancartas, olas ou espumadeiras, entre outros utensilios, tamén se fixeron escoitar acompañados polos pitos dos camións. Varios vestiron de loito polo previsible peche dalgúns negocios. A continuación, asociados da APEHL deron lectura ao comunicado do colectivo nos distintos municipios.

RECLAMAN AXUDAS ÁS ADMINISTRACIÓNS

Co lema ‘salvemos a hostalería‘, os hostaleiros inciden en que “a crise do noso sector arrastra ás empresas distribuidoras, á pesca, ás carnicerías, á agricultura, ás panaderías… a toda a cadea de provedores”. E reclaman ás administracións “axudas directas para poder afrontar esta cadea continua de peches e de restricións de aforos”. “Levamos meses cumprindo coas normativas sanitarias en vigor en cada momento. Estannos a dicir que a porcentaxe de contaxios nos bares e restaurantes é moi baixa, entón non entendemos as medidas que se adoptan”.

As protestas contaron coa presenza de representantes de todos os partidos políticos e recibiron o apoio especial dos traballadores de Alcoa, inmersos na loita por evitar o peche da planta de aluminio primario de San Cibrao.

Coa súa roupa de traballo, participaron activamente nas concentracións a petición do comité de empresa.