Dezaseis dos 17 tripulantes do Adviento Uno, o buque que permanece amarrado no porto de Burela tras localizarse un brote de Covid-19, deron negativo nas probas PCR ás que foron sometidos nas últimas horas. Segundo concretan fontes do Servizo Galego de Saúde (Sergas), están asintomáticos, de xeito que reciben a alta epidemiolóxica e poderán volver polo tanto ás súas casas ou ao traballo.
No Hospital da Mariña queda ingresado polo momento, estable, o outro traballador que resultara infectado. Trátase dun home de 41 anos.
A tripulación permanecía confinada desde mediados do mes de novembro no propio barco, unha situación que denunciou ao non considerar o pesqueiro o lugar axeitado para pasar a corentena.