O Concello de Foz anunciou a través dun comunicado que comeza a elaboración dun Plan de Mobilidade Sustentable que “permitirá mellorar a calidade de vida de todas e todos e a defensa do medio ambiente. Tódolos veciños e veciñas do concello poderán facer achegas a este documento a través dun proceso participativo”, anuncia o alcalde, Fran Cajoto.
EVITAR “O CAOS CIRCULATORIO”
“Todos somos coñecedores das consecuencias que as decisións, precipitadas e sen un estudo previo, tiveron hai ben pouco tempo na vila. Dispoñer as dúas rúas principais –Álvaro Cunqueiro e Avenida da Mariña– no mesmo sentido de circulación provocou un caos circulatorio. Non nos temos que ir moi lonxe para lembrar como se cargaron de tráfico Paco Maañón -a baixada á igrexa, no casco histórico- e a Rúa do Pilar, que non estaba preparada para ser unha vía principal de Foz. Caos que provocaba no verán de 2018 retencións de máis de 40 minutos na saída do núcleo urbano, o que nunca se vira na nosa vila”, explica o rexedor municipal.
Fronte a isto, Cajoto pretende “comezar a casa polos cimentos, non polo tellado. É por iso que, con cargo ao Plan Único 2020 da Deputación, o goberno municipal procedeu á contratación do Plan de Mobilidade Sustentable de Foz, para un estudo integral das infraestruturas existentes e futuras dun xeito conxunto e relacionado”.
“HAI RÚAS DE DOBRE SENTIDO NA QUE NON SE CRUZAN OS VEHÍCULOS”
Este plan concentrará as súas análises e propostas no núcleo urbano de Foz, aínda que considerará todo o termo municipal, “analizando e propoñendo actuacións de distinto alcance para todo o territorio, en particular aquelas que faciliten a comunicación peonil e ciclista entre as parroquias e o núcleo urbano”, indica o executivo municipal.
Cajoto engade que “o plan configúrase como un documento de traballo, de desenvolvemento estratéxico, que ten como finalidade formular un conxunto de actuacións orientadas á implantación de formas de desprazamento máis sustentables: camiñar, bicicleta e favorecer o transporte público”.
O alcalde indica que “hai rúas no casco urbano de dobre sentido de circulación nas que non se cruzan dous vehículos e beirarrúas que en moitos casos non son accesibles. Debemos definir que viais se deben dispoñer con un sentido único de circulación para gañar espazo para o peón e a bicicleta e identificar os itinerarios peonís máis utilizados. Debemos ter un mapa de a onde queremos chegar no casco urbano para que, conforme vaiamos dispoñendo de fondos, as obras se fagan conforme a un criterio definido: con sentido común, con planificación, evitando os erros do pasado”, argumenta.
REALIZARANSE ENQUISAS E O GOBERNO LOCAL COMPROMÉTESE A ESCOITAR A TODOS OS PARTIDOS
Encargarase do Plan de Mobilidade Sustentable unha empresa especializada cun equipo conformado por enxeñeiros e arquitectos con experiencia na materia, pero coa colaboración do conxunto de Foz. “Non só son necesarias as enquisas que imos cubrir sobre as nosas preferencias ou hábitos nos desprazamentos diarios, senón que se reclaman tamén ideas sobre en que zonas actuar. Vaise contar coa visión de toda a corporación municipal e de colectivos e asociacións de Foz e das parroquias: queremos un documento o máis rico posible e para iso todas as achegas son importantes. Este proceso participativo denomínase Móvete Foz, integrando distintas actividades como encontros territoriais e sectoriais, entrevistas con técnicos, tanto na fase de toma de datos e análise como na de formulación e validación das propostas. Dada a situación actual derivada da pandemia do Covid-19 e as restricións e precaucións a considerar por saúde pública, adaptarase este proceso participativo”,
UN DOCUMENTO QUE “FAVORECERÁ AO COMERCIO E Á HOSTALERÍA”
Cajoto tamén salienta “a importancia deste documento para o comercio local e o sector da hostalería. Pensemos nunha vila cómoda e segura para desprazarnos a pé, na que teñamos facilidades para estacionar o noso vehículo privado pero tamén para acceder a un transporte público. Eu nesa vila merco un piso, consumo e fago vida social: trátase dunha aposta tamén pola economía, nun momento especialmente difícil como o que estamos a vivir”, subliñou.
E o concelleiro responsable da Coordinación da Axenda 2030 en Foz, Carlos García, indica que “dentro dos obxectivos da axenda 2030, o Plan de Mobilidade Sustentable é un paso moi importante para acadar o obxectivo 11: conseguir que as cidades e os asentamentos humanos sexan inclusivos, seguros, resilientes e sostibles”.
