Ramón González Rey/EFE. A Audiencia Provincial da Coruña xulgará desde o próximo 10 de decembro a José Manuel López Pérez, coñecido como Coté, acusado de exercer como falso médico en Ferrol e para quen a Fiscalía reclama 334 anos de cárcere.

O Ministerio Público, que o considera culpable de intrusismo profesional, falsidade, homicidio por imprudencia e lesións, acúsao da “morte dun home” e de lesionar “decenas de pacientes”. En suma, o escrito de acusación recolle 129 vítimas nesta causa.

“O acusado, durante polo menos os cinco anos anteriores á súa detención no mes de febreiro de 2008, veu atribuíndose públicamente a condición de médico e executando actos médicos pese a non contar con máis estudos que o Bacharelato e carecer das aptitudes mínimas necesarias para iso”, narra a Fiscalía no seu escrito.

ACTUOU DURANTE DEZ ANOS

Ao longo dos anos e desde polo menos o ano 1998, detalla o fiscal, “elaborou e dotouse dun falso currículo académico e profesional mediante a alteración ou imitación de numerosos títulos e certificaciones de diversos centros docentes e sanitarios tanto españois como estranxeiros, documentos que despois exhibía publicamente”.

“Baixo tal impostura e aproveitando ademais o nome, crédito e firma doutros auténticos profesionais da medicina, conseguiu atraer ao seu local de Ferrol, ao que despois sumou outro en Viveiro, a centenares de persoas ás que cobraba importantes sumas de diñeiro por aplicarlles falsos tratamentos”, indica.

Estes, prosegue, estaban dirixidos supostamente a sanar enfermidades reais preexistentes, nalgúns casos, ou enfermidades inexistentes “que el mesmo ideaba e dicía diagnosticar”, noutros.

COBRABA ATA 15.000 EUROS POR FALSAS OPERACIÓNS

“Tales tratamentos consistían, en ocasións, no fornezo de sustancias non especificadas cuxa toxicidade non chegou a ser determinada, pero tamén, nalgúns supostos, na realización de auténticas operacións quirúrxicas co conseguinte quebranto da integridade física das súas vítimas”, conta a Fiscalía.

As cantidades cobradas polo acusado oscilaban, segundo as persoas e as datas, entre os 20 e os 100 euros por consulta e os 500 e os 15.000 euros por intervencións. Todas esas cantidades eran pagadas en metálico e en case ningunha ocasión se estendía factura nin recibín de ningunha clase.

DIAGNOSTICABA DOENZAS INEXISTENTES E PRACTICABA ACUPUNTURA, INXECCIÓNS OU MESMO INCISIÓNS

Unha muller da provincia de Lugo acudiu á súa consulta dous ou tres días por semana entre o ano 2000 e o mes de febreiro de 2008 aqueixada de artrose. O acusado aceptou esa diagnose e ademais diagnosticoulle diversas patoloxías anatómicas que chamou “cervicobraquialxia bilateral de natureza compresiva, lumbalxia sub-crónica de ritmo mecánico secundaria con irradiación ocasional, ortostatismo persistente (ateroesclerótico) de longa evolución, síndrome de articulación sacroilícaca (subluxación mecánica), espondiloartropatía dexenerativa en columna dorso lumbar e lumbosacra incluíndo articulación sacroilíaca, polidiscopatía cérvico-torácica e lumbosacra de posible orixe infeccioso, desamaños invertebrais menores dolorosos, síndrome de elevador de escápula (miotensivo) intermitente, síndrome de saída torácica (escalenos) de presentación mixta (neurovascular) bilateral” e outras de carácter orgánico e psicolóxico, como a “mediastinitis con marcado compoñente álxico”.

Para o tratamento desas supostas enfermidades o acusado someteu á vítima a manipulacións, a acupuntura, a inxeccións e a drenaxes, ningún dos cales está descrito na ciencia médica como válido. A demais do anterior, en data indeterminada pero posterior en todo caso a febreiro de 2003, o acusado practicoulle unha incisión quirúrxica na cara interna da coxa esquerda con aplicación de puntos de sutura, dirixida segundo el á corrección dunha hernia inguinal, incisión que lle provocou unha cicatriz de 0,5 centímetros na zona afectada. A prexudicada aboou en metálico ao acusado por esas diagnoses e tratamentos ficticios unha cantidade que non foi determinada.

AS VÍTIMAS PADECÍAN ENFERMIDADES TRALOS SUPOSTOS TRATAMENTOS

Outra vítima da provincia de Lugo acudiu á súa consulta entre tres e sete días por semana entre o mes de setembro de 2005 e o mes de febreiro de 2008 pese a que non estaba aqueixada de enfermidade algunha e en principio só acompañaba a esposo. O acusado manifestoulle que a vía moi delgada e desde ese momento diagnosticoulle sucesivamente fibrose intestinal, “escape dun riñón”, “fuga vertebral”, “displexia”, sinusitis, crise nerviosa ou “baile de san vito”, meninxite secundaria aos tratamentos, afta, cancro de lingua secundaria á afta e infección de boca (ou segundo a súa terminoloxía: “síndrome endro-antral complicado tras endodoncia, defecto resortito da raíz con invasión extra-canalar e da raíz en odontón 16 e 17 e sepse xeneralizada da rexión antral, sinusal e macizo facio-frontal dereito”).

Para o tratamento desas supostas enfermidades o acusado someteuna a manipulacións, a acupuntura e a inxeccións en todo o corpo, incluída a cavidade oral. A consecuencia dun dos mencionados tratamentos, concretamente unha das infiltracións practicadas na flexura dun cóbado o día 24 de xaneiro de 2008, a prexudicada sufriu un cadro de distrofia reflexa en grado severo sen resposta a tratamento no antebrazo e a man esquerda coñecido como “man en garra”.

Ademais do anterior, en data indeterminada pero comprendida en todo caso entre as dúas indicadas, o acusado practicoulle polo menos tres incisións quirúrxicas con aplicación de puntos de sutura, unha en rexión frontal dereita que lle provocou unha cicatriz de cinco cms, outra na caluga para a extracción de líquido da que non resta cicatriz e outra na boca dirixida segundo el á biopsia dunha afta da que tampouco resta cicatriz. A prexudicada aboou en metálico ao acusado polas diagnoses e tratamentos ficticios a cantidade aproximada de 50.000 euros.

ASEGUROU A UN DOENTE QUE LLE COLOCARA UN TÍMPANO DE PLASMA XERADO COA SÚA PROPIA SANGUE

Un paciente lucense acudiu á súa consulta dous días por semana entre o mes de agosto de 2005 e aproximadamente o mes de febreiro de 2007 e entre o mes de novembro de 2007 e o mes de febreiro de 2008, aqueixado de dor no cóbado dereito e en ambos xeonllos. O acusado diagnosticoulle artrose de xeonllos, rotura das fibras de suxeción da tróclea, rotura do epicóndilo, ombreiro doloroso e rotura do tímpano dereito.

Para o tratamento desas supostas enfermidades o acusado someteuno a inxeccións nos xeonllos dirixidos a rexenerar líquido sinovial perdido e á colocación no oído, cunhas pinzas e un algodón, do que dixo era un tímpano de plasma xerado coa propia sangue do paciente. Non consta que ningún destes tratamentos ocasionase enfermidade ou menoscabo físico algún á vítima máis aló da dor propia da súa aplicación. Ningún deses tratamentos se atopa descrito na ciencia médica como válido para as patoloxías supostamente detectadas polo acusado.

Ademais do anterior, en data indeterminada pero comprendida en todo caso entre os dous períodos de tempo indicados, o acusado practicoulle polo menos unha incisión quirúrxica no ombreiro esquerdo con aplicación de puntos de sutura que lle provocaron cinco cicatrices de 1,5 centímetros asociadas a outra cicatriz dun centímetro de lonxitude perpendicular a cada unha daquelas. O prexudicado abonou en metálico ao acusado por eses diagnósticos e tratamentos ficticios a cantidade de aproximadamente 12.250 euros.

A FISCALÍA PIDE TRES ANOS PARA A SÚA MULLER, ACUSADA DE BLANQUEO DE CAPITAIS

O sospeitoso estivo por primeira vez en prisión provisional desde febreiro a agosto de 2008 e volveu ingresar no cárcere o 13 de xullo de 2009 e ata o 30 de decembro dese ano, cando se acordou a súa liberdade provisional con obrigación de comparecer semanalmente no Xulgado.

Ademais, o fiscal tamén imputa á súa muller un delito de blanqueo de capitais, polo que solicita que sexa condenada a tres anos de cárcere.