EFE. O restaurante Marinero, de Ribadeo, decidiu utilizar a barra, na que agora non pode atender aos clientes polas restricións derivadas da pandemia, para instalar un belén que ocupa seis metros de longo por 60 centímetros de ancho.
Ademais, os promotores desta idea, para recrear o nacemento, utilizaron residuos do propio establecemento reciclados para a ocasión, como caixas e outros envases de diferentes materiais.
O belén, que ata conta con iluminación e un río con auga que se move nun circuíto pechado -para non malgastala, din os seus promotores-, foi deseñado e construído pola decoradora Susana Bustelo e por traballadores do restaurante Marinero. Estará instalado ata comezos de xaneiro.
Os clientes do establecemento sorpréndense ao ver este curioso nacemento e o xerente, Roberto Rivas Tomé, explicou á prensa que “ao non poder utilizar a barra para servir comida e bebida decidimos usala como escenario para o belén”.
“Así contribúe á decoración de Nadal do local e ao mesmo tempo disuade aos clientes de consumir na barra, algo que actualmente está prohibido polas restricións impostas para evitar a propagación da pandemia da Covid-19“, precisa o propietario.
Rivas espera ter que buscar outra ubicación para o belén no Nadal de 2021 porque confía en que axiña se poida utilizar a barra para atender aos clientes con normalidade.
