A infección por coronavirus de seis residentes no centro de maiores DomusVi de Vimianzo fai subir este sábado o cómputo global de casos de covid-19 nos xeriátricos galegos, que contabilizan un total de 105 usuarios con enfermidade activa, cinco máis que hai 24 horas.
Así figura no balance ofrecido aos medios pola Consellería de Política Social na mañá deste sábado 26 de decembro, no que figuran oito novos positivos respecto ao día anterior, entre eles un na Residencia de Foz, aínda que fontes do xeriátrico concretaron que se trata dun falso positivo, e outros catro no centro Hospital Asilo San Sebastián e San Lázaro de Ribadeo.
Tamén hai outro en San Salvador de Guntín e outro na de Trabada. Aparece así mesmo un positivo no xeriátrico de San Cibrao, dun brote anterior, aínda que fontes do Concello de Cervo aclaran que xa non hai contaxios no centro de maiores.
Con todo, como xeriátrico co maior número de empregados contaxiados continúa o Asilo Vilalba, con 11, mentres que o resto de centros que figuran no parte de Política Social teñen menos dunha decena de traballadores afectados.
Pola súa banda, os centros de atención á discapacidade (CAPD) non rexistran este sábado ningún cambio, polo que se manteñen sen usuarios afectados. Así, hai un caso no centro de Sarria e un en San Vicente de Paúl de Lugo.
