O número de casos activos de coronavirus na provincia de Lugo aumenta a 397, 23 máis ca onte, segundo o reconto ofrecido polo Servizo Galego de Saúde (Sergas). Nas últimas 24 horas localizáronse 41 positivos novos por PCR.
Dos 397 contaxiados, 14 permanecen ingresados. O Hospital Público da Mariña atende cinco pacientes con Covid-19, por oito o HULA -entre eles os tres da área sanitaria lucense que requiren de coidados intensivos- e un o centro hospitalario de Monforte.
No histórico da provincia documéntanse 145 falecementos, 6.449 altas e 6.993 contaxios acumulados. Fixéronse 123.071 probas PCR.
No tocante á situación epidemiolóxica por municipios, e nas horas previas á reunión do comité clínico, trala que a Xunta de Galicia decidirá se se aplican novas restricións, preocupan concellos coma Viveiro, con 58 positivos confirmdos nas últimas dúas semanas, ou Xove, con 40, alomenos oito localizados na residencia San Bartolomeu. Estes dous termos municipais superan a taxa de incidencia acumulada de 250 contaxios por 100.000 habitantes. Ribadeo, en parte por mor do abrocho no centro de maiores, acumula 16, por dez Burela.
Lourenzá e A Pontenova son os únicos municipios da Mariña libres de Covid-19, mentres que O Vicedo, Ourol, O Valadouro, Alfoz, Mondoñedo, Cervo, Foz, Barreiros, Trabada e Riotorto teñen entre un e nove casos, cunha incidencia acumulada especialmente significativa nos concellos vicedense e trabadense (por riba dos 250 casos por 100.000 residentes).
