Usuarios e usuarias do centro de atención a persoas maiores de Ribadeo recibiron hoxe a segunda dose da vacina contra o covid-19. En total, puxéronse 70 vacinas na residencia -a 43 residentes e 27 traballadores- coas que se completa o período de vacinación desta residencia provincial.
Así o informou a Deputación de Lugo a través dun comunicado. Os residentes foron vacinados durante a mañá deste xoves ao igual que o persoal desta instalación. A primeira dose da vacina fóralles subministrada o pasado 31 de decembro.
O alcalde de Ribadeo, Fernando Suárez, dixo que “estamos moi satisfeitos de ter podido completar este ciclo de vacinación na residencia de Ribadeo. Oxalá pronto poidamos facer o mesmo no Hospital Asilo. Iso será cando todos os doentes que padecen o virus estean curados e o gromo estea totalmente erradicado. Agardamos que xa non quede moito para chegar a ese momento”, xulgou.
Está previsto que o sábado reciba a segunda dose da vacina a comunidade da residencia provincial de Pol. Nos vindeiros días tamén será a quenda dos usuarios e traballadores dos centros de Trabada, Castroverde e A Fonsagrada, segundo estipulen as autoridades sanitarias
