A Dirección Xeral de Emerxencias decretou para a tarde deste domingo o aviso laranxa na costa da Mariña, onde se esperan ventos de forza oito e ondas de ata sete metros. Segundo a previsión da Axencia Estatal de Meteoroloxía (Aemet) o aviso estenderase a todo o litoral galego desde a mañá do luns.

Ademais, á primeira hora do luns o aviso estenderase á totalidade do litoral ante as predicións que apuntan a mar combinado do oeste e o noroeste con ondas de ata sete metros, así como vento do suroeste de forza sete na Coruña.

Nun comunicado, a Administración autonómica lembra a importancia de manterse afastados da liña de costa mentres dure a alerta. Así, apela a evitar diques, rompentes, espigóns, peiraos, praias, paseos marítimos e todas aquelas zonas que poidan ser varridas polo mar.

Tamén se recomenda extremar as medidas de seguridade á hora de realizar calquera actividade no mar e revisar os cabos e amarres das embarcacións.