O Servizo Galego de Saúde (Sergas) considera que a situación epidemiolóxica “segue a ser moi preocupante” no conxunto da área sanitaria de Lugo, pero fundamentalmente en determinados concellos como a propia capital, Monforte, Sarria, Palas de Rei e Quiroga.

“Tivemos un crecemento moi grande de casos nos últimos quince ou vinte días e iso xa se traduce nunha elevada presión asistencial“, sinalou o xerente da área lucense, Ramón Ares, en declaracións aos medios. O foco está posto especialmente na evolución do concello de Lugo, onde nos últimos 14 días se diagnosticaron 428 casos activos. A incidencia acumulada sitúase así nos 436 casos por 100.000 habitantes. “Xusto despois das festas de Nadal, movíamonos nunha incidencia de 150. O crecemento na cidade foi exponencial. Preocúpanos pola repercusión nos hospitais“, engadiu Ares.

VILALBA NON MELLORA

En canto ao resto dos concellos, o xerente da área sanitaria citou Sarria ou Monforte de Lemos polo importante aumento dos últimos días, se ben “parece que xa se está ralentizando e parece que xa diminúen os casos”. Non así en Vilalba, que “a pesar de que levamos moito tempo con medidas, segue tendo unha incidencia moi alta e nos últimos días disparouse o número de casos”.

Outros municipios como Palas de Rei e Quiroga tamén están a ser especialmente vixiados polo volume de positivos, pero o propio tamaño do concello e as medidas de confinamento facilitan o control da cadea de transmisión. “Estamos vendo que as medidas son efectivas e que xa están diminuíndo os casos novos que aparecen nestes concellos”, indicou Ares.

En conclusión, o xerente admitiu a preocupación polo aumento xeneralizado nas últimas dúas semanas e polas consecuencias que iso poida ocasionar nos hospitais. “Nunca tivemos unha presión asistencial tan alta como agora, sobre todo no HULA e en Monforte. Na Mariña está a diminuír. É certo que a presión asistencial tamén se deriva do traslado de pacientes doutras áreas, pero aínda así preocúpanos a incidencia e pedimos con maior intensidade que todos sexamos responsables”, rematou.

VACINACIÓN

Por outra banda, Ramón Ares Rico tamén fixo declaracións no que respecta á campaña de vacinación, da que dixo que “segue desenvolvéndose con normalidade”. Explicou que mañá rematará a aplicación da segunda dose, polo que máis de 6.500 dos 7.000 residentes e traballadores dos xeriátricos xa estarían completamente vacinados.

Así mesmo, na primeira fase da vacinación quedaran pendentes algúns centros de maiores que tiñan gromos activos. É o caso da residencia de Xove e a da Pastoriza, onde o proceso está a comezar hoxe.

Ademais, o xerente da área lucense indicou que mañá, mércores 3 de febreiro, o Sergas comezará a subministrar a segunda dose ao persoal de primeira liña. “Isto vai ser tanto no Hospital da Mariña, coma en Monforte e no HULA, así como nas cabeceiras de Atención Primaria”, precisou. “Esperamos que o luns día 8 rematemos coa segunda dose, con máis de 3.500 sanitarios vacinados de forma completa“.