Llano teme que a Xunta “tente xustificar” coas críticas ao Estado “que a EDAR non estea en 2023”

O rexedor lembrou que a depuradora "está comprometida polo Goberno autonómico desde o ano 2014 e sete anos máis tarde aínda está en fase de redacción o proxecto executivo"

O alcalde de Burela, Alfredo Llano. AXM

O alcalde de Burela, Alfredo Llano, amosouse crítico despois de que a Xunta de Galicia reclamase ao Goberno central que axilizase os trámites para a nova estación depuradora de augas residuais (EDAR) do municipio. O rexedor lembrou que “está comprometida polo Goberno autonómico desde o ano 2014 e sete anos máis tarde aínda está en fase de redacción o proxecto executivo”.

O rexedor burelao cualificou de “puro sainete” a resposta dada por Augas de Galicia ao parlamentario conservador José Manuel Balseiro na xornada de onte, instando ao Executivo central a axilizar os trámites para a depuradora de Burela. Llano pensa que están “tentando xustificar que a nova EDAR non estea rematada en 2023”, o que suporía a perda de fondos europeos, e pide que os traballos se acometan “o mellor e o antes posible”.

VE A PREGUNTA DO PP NO PARLAMENTO “UN SAINETE”

Llano dixo que “esta EDAR foi comprometida xa no ano 2014 pola Xunta de Galicia para realizala o antes posible; estamos a 2021 e aínda están sen facerse certas cousas que son tremendamente necesarias, como é o proxecto executivo que aínda está en fase de redacción, espero que estea xa en redacción e non en licitación, e despois a obra complementaria que é necesario facer para o sumidoiro”.

O rexedor manifestou: “o que observei é que din que se algo ía mal era por culpa dunha administración terciaria, cando realmente o compromiso único e claro é da Xunta de Galicia. Entendo que deben traballar para realizar esta obra, que é moi necesaria, porque un concello como Burela ou calquera da Mariña e de Galicia deben ter xa esta dotación porque o medio ambiente esixe este tipo de instalacións e facelas o antes posible, de acordo sempre coa normativa que agora se está aplicando da Unión Europea. Polo tanto, estráñame que fagan este tipo de actuacións, que ás veces daba o aspecto de que era un puro sainete, para xustificar que ao mellor non se pode realizar no prazo que queda, que con todas as prórrogas tería que estar rematada no 2023″, apuntou.

O 60% DOS FONDOS PARA UNHA OBRA DE NOVE MILLÓNS, EN ENTREDITO

“Hai que lembrar que hai unhas axudas moi importantes da Unión Europea, esta obra esta taxada en nove millóns de euros dos que o 60% son aportados pola Unión Europea e o 40% pola Xunta de Galicia. Vexo que se falaba de que o Estado complicaba tremendamente a realización da obra e aquí o único que se fixo por parte do Goberno autonómico foi solicitar, hai tempo xa, unha avaliación ambiental”.

O alcalde subliñou que “Costas respondeu a isto en setembro de 2019, non como di a Xunta que foi en marzo de 2020. Aí as recomendacións que se dan a Augas de Galicia, para instalar a Edar no porto de Burela, é que se cumpra coa normativa e que o emisario estea a uns douscentos metros da praia, por exemplo do Portelo, para que non poida contaminala. O único que di Costas é iso, de acordo cos datos que lle pasan, para nada di que non se poida facer de acordo coa pretensión da Xunta de Galicia”, precisou.

“Hai documentación para verificar que Costas está para apoiar e non para poñer pegas, pero entre as administracións hai que cumprir a normativa. Ademais esta é unha esixencia extraordinaria na cuestión do medio ambiente, hai que procurar non molestar nin ás especies, nin ao entorno, nin ao medio ambiente, nin aos bañistas. Polo tanto, hai que ser rigorosos e facer as obras moi ben feitas”, xulgou.

Llano asegurou que “eu non noto para nada que vinculen a obra a certas esixencias. O que si esixen é que unha vez que teñan feito o proxecto executivo, que supoño que estarán xa con el, que o manden a Costas para poder avalialo. Nese proxecto executivo si que debe haber a xustificación de onde vai a Edar e como deben facerse as obras complementarias.

CARGA CONTRA BALSEIRO: “CANDO ESTABA NA XUNTA NON MOVEU UN SÓ FÍO”

O rexedor sostivo que “eu falei con Costas para que, unha vez que reciba ese proxecto executivo, se dean presa en contestar para poder cumprir os prazos, pero hai que ter en conta que os prazos van moi diluídos derivado do pouco apuro que se deron desde a Xunta, porque despois de sete anos estar aínda pensando en como vai ser o proxecto executivo é un pouco difícil de entender. Imos procurar entre todos facer a obra o mellor e o antes posible, e de acordo cos prazos. Hai que ter en contra que o contrario sería unha desculpa”, afirmou.

“Entendo que esta é unha obra merecida e necesaria para a veciñanza de Burela, e que esteamos todos á altura das circunstancias e fagamos o que teñamos que facer, co rigor e a responsabilidade que nos corresponde a todas as administracións, pero que non andemos pasando a bola de que isto non incumbe cando non é certo”, manifestou.

O alcalde engadiu que “se falou de que non había respecto institucional. Eu ao señor Balseiro, cando era delegado da Xunta, téñolle dito moitas veces que tíñamos que ir conxuntamente na marcha da Edar de Burela e non moveu un so fío para isto e onte sae botándolle as culpas a terceiras administracións. Isto é o que non pode ser, quítanos mérito na política e sería moito mellor que todos estivéramos apurando para que a Edar de Burela sexa unha realidade o antes posible”, concluíu.

RESPOSTAR

Please enter your comment!
Please enter your name here