Debido á actual situación de pandemia, o IES de Foz vese obrigado a adiar o que sería o XIV Campionato Internacional de Baristas, que se viña celebrando todos os anos. Coa fin de facer algo simbólico, dende a organización do evento decidiron facer unha serie de videoconferencias orientadas a escolas de hostalería os días 10, 11 e 12 de febreiro, entre as 09.00 e as 12.10 horas.
Estas actividades serán emitidas por Webex en aberto e tamén se gravarán para que aqueles que non poidan conectarse nese horario poidan visualizalas máis tarde. O alumnado do centro asistirá ás charlas dende as súas aulas, sempre mantendo os protocolos Covid-19.
A dirección do IES de Foz destaca que “o evento contará cun total de doce relatores, que a través de charlas relacionadas co café achegarán un pouco máis ó alumnado a este mundo barista. Entre eles contamos con antigos alumnos do centro e tamén doutros centros de hostalería de Galicia, como Willy Gómez, Diego López ou Sofía Prieto”, expón a organización.
