O Concello de Cervo aprobou no pleno o regulamento de rexime interno do centro de día e residencia. Trátase do derradeiro paso para a posta en funcionamento do servizo, que o goberno local prevé “para o mes de xullo”, segundo asegura o alcalde, Alfonso Villares.
Manutención e dietas, limpeza e mantemento, servizo de transporte, documentación precisa para presentar ao ingresar, normas de convivencia e dereitos e obrigas dos usuarios son algúns dos aspectos que aborda a normativa aprobada no pleno, co voto a favor dos sete edís do Partido Popular (PP) e a abstención dos tres concelleiros do PSdeG-PSOE e do representante do BNG.
o concello aprobou o regulamento do servizo coa abstención de psoe e bng
O proceso de adxudicación rematou no pasado mes de abril. A Asociación Edad Dorada Mensajeros de la Paz Castilla-La Mancha y Galicia obtivo a maior puntuación das propostas presentadas, e gozará da concesión por un período de dous anos. “Isto parécenos relevante. Tentamos acadar o prazo máis curto posible e así o seguinte goberno, que saia das vindeiras eleccións municipais, poderá avaliar a xestión e decidir se a renova ou non”, asegura o rexedor.
A empresa concesionaria sobresaíu nun proceso que examinou cun 60 por cento a puntuación final o aspecto económico, e nun 40 outra serie de criterios, como o programa de traballo, o proxecto de explotación ou a metodoloxía de intervención.
INFORMACIÓN AOS VECIÑOS
O goberno local procederá agora a repartir entre os domicilios do municipio unha serie de folletos informativos, para que as persoas maiores en situación de dependencia e as familias interesadas podan realizar a súa preinscrición no rexistro do concello. O prazo para facelo comezará o 14 de xuño e rematará o 29 dese mes. Neste concurso terán preferencia os veciños censados en Cervo.
DO 11 AO 13 DE XUÑO HABERÁ XORNADAS DE PORTAS ABERTAS PARA COÑECER O CENTRO
Uns días antes da apertura do prazo de preinscrición, haberá –do 11 ao 13 de xuño– unhas xornadas de portas abertas para que os potenciais usuarios e as familias coñezan as instalacións.
RESIDENCIA E CENTRO DE DÍA
O centro dispón de 54 prazas de residencia e 25 de centro día. Conta con cociña integrada, lavandería, sala de rehabilitación, enfermería, baños individuais adaptados ou bañeiras xeriátricas. Ofrece os seguintes servizos: rehabilitación funcional, terapia ocupacional, estimulación cognitiva, atención médica, enfermería e atención sociosanitaria preventiva.
O Concello agarda que a residencia axude a “dinamizar economicamente o Concello” e tamén a xerar emprego, posto que necesitará “de entre 20 e 25 postos de traballo, aproximadamente”, sostén Villares.
