O número de casos activos de coronavirus na provincia de Lugo baixa a 427, 29 menos ca onte, segundo o reconto ofrecido este mércores polo Servizo Galego de Saúde (Sergas). Desde a anterior actualización detectáronse once positivos novos por PCR.
Dos 427 contaxiados, 37 permanecen ingresados (14 deles en coidados intensivos, todos no HULA). Os 23 pacientes con Covid-19 en plantas de hospitalización repártense entre o propio Hospital Universitario Lucus Augusti (19) e o centro hospitalario de Monforte (catro). O Hospital Público da Mariña está actualmente libre de positivos.
No histórico da provincia documéntanse 206 defuncións, 11.092 altas e 11.729 casos acumulados desde o inicio da pandemia. Fixéronse 189.341 PCR, o que implica que desde o anterior reconto efectuáronse 792 probas.
No que atinxe á situación epidemiolóxica por municipios, O Vicedo, Ourol, Xove, O Valadouro, Cervo, Alfoz, Foz, Barreiros, Trabada, A Pontenova e Riotorto non contan positivos confirmados nos últimos sete días.
Entre un e nove teñen Viveiro (cunha taxa de incidencia acumulada entre os 26 e os 75 casos nunha proxección a 100.000 habitantes), Burela (entre 25 e 11), Ribadeo (entre 26 e 75), Mondoñedo (entre os 26 e os 75) e Lourenzá (entre 126 e 250 positivos por 100.000 resindentes). O municipio laurentino padecerá desde o venres restricións de nivel alto, sendo o único da Mariña nas que se aplican.
