O número de casos activos de coronavirus na provincia de Lugo baixa a 188, cinco menos ca onte, segundo o reconto ofrecido este martes polo Servizo Galego de Saúde (Sergas). Desde a anterior actualización detectáronse dous positivos novos por PCR.

Dos 188 contaxiados, doce permanecen ingresados (tres deles en coidados intensivos, todos no HULA). Os nove pacientes con Covid-19 en plantas de hospitalización repártense entre o propio Hospital Universitario Lucus Augusti (oito) e o Hospital Público da Mariña, que atende un positivo, un menos ca onte.

No histórico da provincia documéntanse 211 defuncións, 11.556 altas e 11.960 casos acumulados desde o inicio da pandemia. Fixéronse 201.018 PCR, o que implica que desde o anterior reconto efectuáronse 466 probas.

No que atinxe á situación epidemiolóxica por municipios, Viveiro (cunha taxa de incidencia acumulada menor a dez positivos por 100.000 habitantes), Xove (con entre 76 e 125), Burela (con entre 76 e 125) e Riotorto (con entre 76 e 125) son os concellos da Mariña que rexistraron algún contaxio novo nos últimos sete días, sempre por debaixo dos dez casos. Os restantes termos municipais da comarca non documentaron novas infeccións nese mesmo prazo dunha semana.