O Concello do Vicedo lembrou este martes que está restrixindo temporalmente o acceso ao Fuciño do Porco, tamén coñecido como Punta Socastro, logo de que se producisen desprendementos de terras nunha das zonas desta formación rochosa, un dos recursos turísticos máis concorridos da Mariña Lucense.

O goberno local indicou o pasado 8 de marzo a través das redes sociais que desde ese día quedaba prohibido o acceso por mor de obras de reparación, que están a acometer tanto a Autoridade Portuaria Ferrol-San Cibrao como o propio Concello.

Con todo, o executivo municipal alertou da presenza de visitantes, que se están a saltar a prohibición. Nunha páxina non oficial do Fuciño do Porco en Facebook pódese comprobar como continúan as visitas, testemuñadas polos propios visitantes nas redes sociais.