Os grupos municipais do BNG en Cervo e Burela reclamaron o pasado xoves a dragaxe do encoro de Rúa tralo anuncio feito pola Consellería de Infraestruturas para adquirir a titularidade das instalacións da rede básica de abastecemento de auga de ambos municipios.

A formación frontista quixo aclarar, “trala información aparecida nos medios nas últimas datas acerca dunha débeda dos Concellos con Augas de Galicia, que se debe a unha denuncia feita polo propio ente hidráulico da Xunta ao consorcio de explotación da rede básica de abastecemento de auga, do que o organismo participa”.

“Xa nos chama a atención que unha entidade que participa no consorcio denuncie ao propio consorcio, pero é que faino por unhas obras das que a entidade autonómica foi ampliando o seu importe de xeito unilateral, sen contar cos Concellos”, sinalou Mario Pillado, voceiro do BNG en Burela. O edil burelao continuou dicindo que “é tamén chamativo que se executaran obras por 8,5 millóns de euros e non se levara a cabo a dragaxe do encoro de Rúa, algo que vimos demandando dende hai moito tempo”.

Para os nacionalistas, a dragaxe é fundamental posto que “cada vez que a auga presenta turbidez actívase o bombeo de auga do encoro de Río Covo, motivo polo que en Cervo e Burela pagamos a auga máis cara de Galicia. Executando esta obra non sería necesario o bombeo e poderíase diminuír o prezo das taxas”, argumentou o voceiro do BNG en Cervo, Diego Fernández.

O concelleiro cervense sinala que “se o acordo coa Consellería supón que as arcas municipais dos Concellos non teñan que facer fronte á débeda, logo non pode implicar un aumento nas taxas que pagan as veciñas e os veciños de Cervo e Burela, que xa son do máis abusivas“. Para rematar, Fernández sentenciou que “xa sexa nun consorcio ou nunha mancomunidade, este organismo debe servir para garantir un abastecemento de auga de calidade, non para facer negocio con obras e contratos de mantemento“.