O número de casos activos de coronavirus na provincia de Lugo aumenta a 139, seis máis ca onte, segundo o reconto ofrecido este martes polo Servizo Galego de Saúde (Sergas). Desde a anterior actualización detectáronse seis positivos novos por PCR.
Dos 139 contaxiados, once permanecen ingresados (tres deles en coidados intensivos, todos no HULA). Os oito pacientes con Covid-19 en plantas de hospitalización repártense entre o propio Hospital Universitario Lucus Augusti (cinco) e o centro hospitalario de Monforte (tres). O Hospital Público da Mariña queda sen pacientes con Covid-19 (un menos ca na anterior actualización).
No histórico da provincia documéntanse 212 defuncións, 11.743 altas e 12.099 casos acumulados desde o inicio da pandemia. Fixéronse 207.787 PCR, o que implica que desde o anterior reconto efectuáronse 350 probas.
No que atinxe á situación epidemiolóxica por municipios, Viveiro (cunha taxa de incidencia acumulada de entre 11 e 25 positivos por 100.000 habitantes), Cervo (entre 11 e 25), Burela (entre 11 e 25), Foz (menor a dez) e Barreiros (con entre 76 e 125 casos por 100.000 residentes) rexistraron algún caso nos últimos sete días, sempre menos de dez, mentres que no resto dos concellos da Mariña non se localizaron novas infeccións nese mesmo prazo dunha semana.
