A polémica sobre a toponimia da Ría de Ribadeo, lonxe de calmarse, acrecéntase. Tras as críticas recibidas por algúns políticos, entre eles o rexedor de Ribadeo, e partidos galegos como o BNG, a nova denominación de “Ría del Eo”, tamén houbo rexedores e políticos asturianos que saíron na defensa desta denominación.

Así, o alcalde de Vegadeo, César Álvarez, posiciónase claramente a favor da denominación “Ría do Eo” para o estuario que une (ou divide) Asturias e Galicia, porque desde sempre foi o utilizado nesa marxe da ría. En declaracións na Cope destacou que “estas definicións teñen moito contido emocional”. Para el en todo caso o estuario chamaríase “Ría de Castropol, pois a poboación máis importante no seu día foi Castropol”.

Tamén o deputado popular polo Occidente na Junta General del Principado, Álvaro Queipo, oriúndo de Castropol, defende a utilización do topónimo Ría do Eo. El foi o impulsor dunha iniciativa parlamentaria para solicitar a oficialización do nome e defende, ante as críticas lanzadas polo alcalde de Ribadeo, que é tan válido un nome como o outro. En declaracións á Cope destacou que “non temos ningunha intención soberanista nin queremos expor ningún conflito con Galicia (…) só queremos que os dous topónimos -que xa se conviven na realidade- se trasladen aos documentos”.

Ademais, contradi a tese de Fernando Suárez sobre que a denominación debe ser a da poboación máis importante ao longo da historia, e pon exemplo de rías en Cantabria ou País Vasco que levan o nome do río, non o da localiade onde desemboca.