Barreiros e Trabada son os concellos da Mariña máis golpeados por novos casos da covid e, a eles se suma tamén Ribadeo, cun incremento de ocntaxios preocupante nos últimos días.

Nas últimas horas, o Sergas efectuou un cribado entre a comunidade educativa de Trabada, ao que asistiron alumnos e traballadores do CEIP Plurilingüe Celso Currás e do Punto de Atención á Infancia (PAI), que non arroxou novos positivos confirmados por PCR. Con todo, con respecto á incidencia do virus Covid-19 en Trabada, segundo os últimos datos mostra unha incidencia acumulada a 14 días superior a 500 casos por 100.000 habitantes, cun número total de casos activos que non supera a decena.

Si superan o dez casos Barreiros, con 11 contaxios confirmados e un nivel de incidencia superior a 250 casos por 100.000 habitantes. Precisamente, Barreiros continúa unha semana máis no nivel alto de restricións decretado pola Xunta de Galicia, o que supón na práctica que os establecementos hostaleiros do municipio non poden servir no interior dos seus locais, soamente nas terrazas a un 50% de capacidade. Pola súa banda, Trabada estreaba este venres o nivel medio de restricións, que supón un 30% de aforamento no interior e un 50% nas terrazas dos locais de hostalaría.

OUTROS CONCELLOS AFECTADOS

Ribadeo, con 13 contaxios confirmados e unha incidencia superior a 50 casos por 100.000 habitantes, mesmo nivel no que se achan os municipios de Burela, Foz, Mondoñedo e O Vicedo.

Nun chanzo inferior, cunha incidencia superior a 25 casos por 100.000 habitantes, están os municipios de Cervo, Lourenzá, Viveiro e Xove, mentres Alfoz, Ourol, A Pontenova e O Valadouro atópanse sen novos contagios nas últimas semanas.

Na área sanitaria de Lugo, A Mariña e Monforte rexistra a día de hoxe 205 casos de Covid-19, medio centenar máis que a principios da pasada semana.