O conselleiro de Sanidade, Julio García Comesaña, confirmou este martes que o investimento no hospital da Mariña continuará coa segunda fase e a terceira do proxecto de reforma. Así, en 2022 comezarán os traballos que contan cun investimento de 15 millóns de euros tras ser adxudicado o mes pasado.

Esta obra, correspondente á segunda fase, suporá unha reforma integral de 8.300 metros cadrados e a construción dun novo edificio. Proximamente presentarase o proxecto e iniciarase o proceso para desenvolver e licitar a obra o próximo ano.

En consecuencia, 2022 será o ano no que se inicie esta segunda fase, á vez que, indicou o conselleiro, a Xunta seguirá equipando o hospital, que este ano recibiu dous novos equipos radioquirúrxicos por valor de 180.000 euros. En breve, disporá dun novo ecógrafo para o servizo de urxencias, froito da licitación que o Sergas efectuou no presente.

O conselleiro de Sanidade realizou este martes unha visita ao Hospital da Mariña, na que destacou que a finalización da obra de eficiencia enerxética, que comprobou este martes, trátase dunha “actuación moi importante para os pacientes pero tamén para o Sergas en xeral e mesmo para o conxunto de Galicia”.

Comesaña destacou que a obra permitiu mellorar toda a envolvente térmica do edificio mediante a instalación dunha fachada ventilada de granito no piso inferior e de formigón polímero no resto de alturas. Así mesmo, instalouse o illamento térmico sobre as cubertas planas existentes, aproveitando para impearmeabilizalas e renovar as baixantes das cubertas inclinadas. Xunto co anterior, substituíronse as antigas carpintarías exteriores, con vidros de mellor comportamento térmico.

Comesaña subliñou que esta obra permite ter un hospital “moito máis sustentable, cun sistema de calefacción que pasa dun nivel F a un nivel A, que posibilita un aforro de enerxía primaria de 800 megawatts ao ano e unha diminución anual das emisións de 151 toneladas de CO2, co que se gaña nun centro sanitario “máis confortable para pacientes e profesionais e máis respectuoso co medio ambiente”.

Na visita, o conselleiro estivo acompañado do delegado territorial da Xunta, Javier Arias, e polo xerente da área sanitaria de Lugo, A Mariña e Monforte, Ramón Ares.

As actuacións anunciadas súmanse ás finalizadas o pasado ano e que supuxeron a ampliación en máis de 9.500 metros cadrados do hospital, tras un investimento de 13 millóns de euros en obra e 2 millóns en equipamento.