A Plataforma Sanitaria da Mariña anuncia que a segunda mesa informativa cara á manifestación do 14 de novembro en Compostela colocarase o próximo martes 9 de novembro na porta principal do hospital da Mariña, ás 12 horas.
O acto pretende informar “a veciñas e veciños dos motivos para mobilizarse en defensa dunha sanidade pública de calidade e nomeadamente da Atención Primaria, que nestes momentos atópase nunha situación de desmantelamento completo, con falta de profesionais, sobrecarga de traballo por ter que asumir pacientes de compañeirxs que piden permisos sen cubrir, orzamentos escasos, e xornadas laborais con pacientes a atender inasumibles”.
Nesta mesa recolleranse sinaturas para plasmar a necesidade de acometer profundas reformas do sistema e para manifestar o noso apoio á mobilización. Haberá autobuses gratuítos para acudir á manifestación desde a comarca. Para anotarse hai que chamar aos teléfonos 982 140 654 // 982581861 e 667 052 058. O último día para anotarse será o xoves 11 de novembro.
DERIVACIÓNS AO HULA POR FALTA DE CAMAS NO HOSPITAL DA MARIÑA
O colectivo sanitario tivo coñecemento de que se está a derivar pacientes da Mariña cara o HULA por falta de camas no hospital da Mariña. “Levamos moito tempo dicindo que a ampliación acometida no hospital era mui necesaria máis insuficiente, pois estamos a ver que non resolve os problemas desta comarca“.
A plataforma asegura que a ampliación non ía “chegar para un territorio de setenta mil habitantes, mais fíxose de maneira apurada, sen escoitar nin ter en conta as necesidades”. Tamén asegura que ante a presión social da Mariña “ as e os representantes políticos do PP na comarca puxeron a Feijóo nunha situación comprometida”, refiren os activistas sanitarios. “Isto é outro motivo máis para acudir masivamente á manifestación do 14 de novembro, pois é a presión social , e solo ela quen fai mudar a vontade privatizadora do goberno da Xunta”.
Conclúe a coordinadora da plataforma, Montse Porteiro que “detrás dunha fachada mui bonita hai múltiples carencias e poucas o ningunha solucións aos problemas do hospital ; nestes momentos de insuficiencia de medios é cando se ve quen é o que realmente está a mentir a mariñás e mariñaos”.
