O Concello de Ribadeo agarda que a situación coa recollida de lixo no municipio, que arrastra problemas desde a entrada en concurso de acredores da anterior adxudicataria, Soil Recovery, estea “normalizada no prazo de tres semanas”.
Así o asegurou o concelleiro de limpeza viaria, Jorge Díaz Freije, que anunciou a contratación da empresa Ascam para a recollida de cartón porta a porta, dos envases lixeiros e do punto limpo.
O goberno local asegurou que a firma “comeza o traballo esta semana” e que exercerá provisionalmente “ata que saia de novo a concurso público este servizo”.
O goberno local externalizará esta prestación á espera de que, “en cinco ou seis meses, saia outra vez a concurso público este contrato”, apunta Díaz Freije.
RESPECTAR OS “TEMPOS LEGAIS”
O Concello lembra que “a empresa anterior deu en quebra” e que houbo que agardar “uns tempos legais para rematar os trámites de rescisión do contrato coa anterior adxudicataria do servizo”.
O concelleiro agradece “o bo comportamento dos veciños e dos comercios” nunha situación que califica de “emerxencia”.
