A Xunta de Galicia anunciou que este luns iniciou os traballos para a eliminación de tres puntos de vertido incontrolado (PVI) no municipio de Trabada.
En concreto, a Consellería de Medio Ambiente, Territorio e Vivenda está a actuar nos lugares de Fornea, Vilapena e Abres.
Segundo explicou o Executivo autonómico, os traballos consistirán na recollida, clasificación e retirada do material acumulado nestas zonas.
A primeira vista, sinalan desde o Goberno galego, trátase de residuos procedentes da construción e demolición, plásticos, pneumáticos fóra de uso, lixo de aparellos eléctricos e electrónicos e restos de poda.
Os traballos incluirán a revexetación dos solos mediante o estendido de terra vexetal e hidrosementeira.
As actuacións, cun orzamento que supera os 15.000 euros, forma parte dunha campaña continuada da Xunta para identificar e erradicar estes focos.
Nestes puntos acumúlanse residuos sólidos de distinta natureza co prexuízo que ocasiona para a contorna desde un punto de vista ambiental e estético.
ELIMINAR HÁBITOS
Coa limpeza dos puntos de vertido incontrolado perséguese, segundo a Xunta, minimizar e corrixir os impactos e a degradación ambiental orixinados por este tipo de acúmulos. Así, acádase a integración do lugar coa súa contorna e elimínase o hábito entre a poboación de seguir depositando lixo nestes lugares.
