O BNG de Viveiro solicita ao goberno local que poña en marcha un plan para suprimir os que califican de “puntos negros” nalgunhas estradas do municipio, “ben por mor da alta densidade de tráfico, da ausencia de beirrarrúas, da mala semaforización ou da carencia de semáforos, da ausencia de pasos de peóns ou do deterioro do firme”.

Unha das zonas que o grupo municipal do BNG considera perigosa é a travesía de Covas, onde “os sustos para a poboación e os accidentes son unha constante neste tramo e onde a veciñanza segue vivindo unha preocupante inseguridade viaria”.

Outro dos lugares nos que hai risco de accidentes, “extremadamente perigoso” segundo o BNG viveirense, é a LU-540 á altura do Cristo e da ponte de Landrove. Os nacionalistas aseguran que apoian unha iniciativa de recollida de sinaturas para reclamar á Xunta de Galicia, titular da estrada, medidas de calmado do tráfico.

O “estado lamentable” da estrada LU-161 que atravesa as parroquias de San Andrés, Chavín, San Pedro e Landrove é outra das reivindicacións dos nacionalistas, denunciada polo BNG no Parlamento galego.