O Consello da Xunta de Galicia deu luz verde á declaración de emerxencia das obras de reparación dos danos causados polas inundacións en Viveiro, que afectaron a ducias de vivendas e provocaron a morte dunha anciá.
A medida posibilitará o inicio de traballos de rehabilitación, cunha dotación de 123.000 euros, nas estradas e marxes fluviais danados polo rebordamento do río Xunqueira e do regato de Trasposta.
O Executivo autonómico comprometeu nos próximos días un camión adaptado para a limpeza dos sumidoiros afectados polo rebordamento.
AVALIACIÓN DE DANOS
O Concello continúa a avaliar os danos producidos polas riadas para solicitar ao Goberno a declaración de Zona de Emerxencias de Protección Civil. O prazo de presentación das solicitudes remata o vindeiro 19 de setembro.
O goberno local ve lonxana a posibilidade de solicitar a declaración de Zona Catastrófica. Unhas 150 persoas pasaron pola oficina de asesoramento aos afectados habilitada no consistorio.
