Os avisos meteorolóxicos previstos por Meteogalicia para a xornada deste venres constatan que continuarán os fortes ventos en practicamente toda Galicia e o mar combinado no litoral da Coruña e Pontevedra. Con todo, o nivel de risco pasará do laranxa ao amarelo.

En concreto, a partir da medianoite e durante as primeiras horas do venres 21 de outubro, practicamente toda Galicia estará cunha alerta amarela por fortes refachos de vento. Así, nas montañas de Lugo e Ourense, así como na comarca da Mariña, espéranse ventos do suroeste con refachos de máis de 80 quilómetros por hora ata as 12,00 do mediodía.

No mar, tamén soprarán do suroeste ventos de forza 7 no noroeste da Coruña (ata as 15,00 horas) e na Costa da Morte (ata mediodía).

En canto á ondada, o aviso de Meteogalicia foi laranxa por ondas de 5 a 6 metros ata as 3,00 da mañá no noroeste da Coruña, e ata as 6,00 nas Rías Baixas e na Costa da Morte. Despois, o nivel será amarela, con ondas de 4 a 5 metros.

ALERTAS DO SÁBADO

O resto da xornada do venres, a situación meteorolóxica será de normalidade e así continuará ata o sábado. Ese día, comezará ás 3,00 da mañá un aviso amarelo por ventos de forza 7 desde o sur nas Rías Baixas e na Costa da Morte, que pasarán a ser de forza 8 de 12,00 a 15,00 do mediodía.

En terra, o aviso amarelo por ventos de máis de 80 quilómetros por hora afectará o oeste da Coruña –de 6,00 da mañá a 15,00 da tarde–, á montaña de Lugo –de 6,00 a medianoite–, á comarca da Mariña –de 6,00 a 18,00– e na montaña de Ourense –de 6,00 a medianoite–.