EFE. Un home residente en Viveiro foi detido por cultivar marihuana nun laboratorio doméstico construído no seu domicilio e por agredir a súa nai, segundo informou a Policía.
A. P. M., de 36 anos, foi arrestado o pasado xoves na súa vivenda da Rúa da Misericordia despois de que axentes policiais acudiran tras recibir unha denuncia de que estaba a agredir a súa nai.
Ao chegar ao domicilio, os axentes percibiron un intenso cheiro e a muller indicoulles que o seu fillo cultivaba marihuana dentro da casa, polo que procederon a detelo como sospeitoso de tráfico de drogas e de malos tratos no ámbito familiar.
INVERNADOIRO “EN PERFECTO FUNCIONAMENTO”
Logo de obter un permiso xudicial para inspeccionar a vivenda, os axentes descubriron tres plantas de marihuana nun invernadoiro montado na terraza, que contaba con tubos de extracción de aire e unha cabina térmica ubicada no interior do piso.
Ademais, atoparon obxectos e maquinaria para o cultivo da marihuana, incluíndo extractores, tubos, humidificadores, lámpadas térmicas e sensores de humidade, un material “en perfecto funcionamento para o cultivo” da planta, polo que o sospeitoso foi posto a disposición xudicial.
