EFE. O goberno local de Mondoñedo informou a EFE de que abriu un expediente ao traballador que supostamente “matou a paus” a unha gaivota ferida neste municipio da Mariña Lucense.
Fontes do executivo municipal informaron de que a súa intención é actuar “con total contundencia” ante unha conducta que resulta “inaceptable“.
Desmárcase igualmente o Concello dese suceso, porque o traballador “tiña ordes” de recoller ao animal para que fose trasladado a un centro de recuperación.
Así mesmo, a Policía Local de Mondoñedo instruíu o correspondente atestado, que foi remitido á Fiscalía para que determine se hai indicios de delito e “cal é o procedemento a seguir”.
OS ANIMALISTAS PIDEN UNHA INVESTIGACIÓN
A Asociación Animalista Libera denunciou a morte violenta dunha gaivota no termo municipal, que se tería producido o pasado martes 23 de abril, a causa dos “paus” que supostamente propinou ao animal un “empregado do propio Concello”.
Os activistas pediron unha investigación e a preceptiva “depuración de responsabilidades”. Segundo explica o colectivo, un particular avisou ao Concello da presenza dunha gaivota ferida e desde a autoridade municipal asegurouse que o animal ía ser trasladado ao Centro de Recuperación de Fauna, ubicado no Veral.
Nun comunicado, Libera explica que “pouco despois apareceu un individuo, que o denunciante identifica como empregado do Concello, cun pau na man” e dixo “vouna anestesiar“. Finalmente, “deulle un forte golpe na cabeza“, aseguran os animalistas.
